Í 19. grein fjarskiptalaga er kveðið á um að til alþjónustu teljist þjónusta við öryrkja og notendur með sérstakar þjóðfélagsþarfir. Mikilvægt er að þau tækifæri sem skapast með þróun fjarskipta nýtist öllum, en með notkun tækninýjunga má umbylta lífskjörum fjölmargra sem eiga við fötlun að stríða.
Póst- og fjarskiptastofnun tekur þátt í starfi norræns samstarfshóps um fjarskipti og fatlaða NFTH (Nordisk Forum For Telekommunikation og Handikap). Þar eru samræmdar aðgerðir til að veita fötluðum sem best aðgengi að upplýsingasamfélaginu. Hópurinn hefur síðan 1987 starfað undir Norrænu samstarfsnefndinni um málefni fatlaðra (NSH). Hann leggur fram tilmæli og leiðbeiningar til norrænu ríkisstjórnanna um sérlausnir fyrir fatlaða svo þeir megi njóta góðs aðgengis að fjarskiptum og upplýsingatækni. Þá er markmið þessa samstarfs að miðla upplýsingum til fatlaðra um nýjar tæknilausnir sem geta auðgað líf þeirra og möguleika til virkrar þátttöku í samfélaginu. Þetta er í samræmi við fjarskiptaáætlun fyrir árin 2005-2010.
Málþing í Reykjavík 26. september 2007
NFTH hópurinn hélt samráðsfund í Reykjavík dagana 24. - 25. september 2007. Í framhaldi af fundinum stóð PFS fyrir opnu málþingi um fjarskipti fatlaðra þar sem fulltrúum mismunandi hópa sem koma að fjarskiptum fatlaðra var stefnt saman til skrafs og ráðagerða. Dagskrá málþingsins og glærur fyrirlesara má nálgast hér fyrir neðan.
Málþing í Reykjavík 25. maí 2005
Í maí árið 2005 var einnig haldið málþing í tilefni af fundi NFTH hópsins í Reykjavík undir heitinu Aðgengi fatlaðra að upplýsingasamfélaginu og hjálpartæki sem hafa verið þróuð. Dagskrá og glærur frá málþinginu má nálgast hér fyrir neðan.
Sjá einnig:
Leiðbeiningar um sérlausnir fyrir fatlaða